تعرف على 40 قاعدة لأي حاجة | قواعد “ التصوير الإربعين ”
منذ ان تم اصدار كتاب “قواعد العشق الاربعون” للروائية التركية «إليف شافاق» تداول عدد كبير من نشطاء موقع التواصل الاجتماعى “فيس بوك” القواعد الاربعون فى شتى المواضيع بشكل ساخر .
فى هذا التقرير نعرض القواعد التى يحتاجها من يحب التصوير كهواية او مهنة، وجاءت هذه النصائح والقواعد كالتالي :-
- اوعى تقول على نفسك مصور
- متركزش في ام الكاميرا وتسيب العدسات
- متحطش توقيع فوتوجرافر
- متصورش وانت ماسك الكاميرا وحطتها على عينك
- متعملش صفحة علي فيس بوك اول ما تجيب الكاميرا وتسميها فوتوجرافر الرهيب
- ركز في الصورة وتكونها
- متركزش في الصورة هتطلع حلوه ولا وحشه المهم عجباك ولا لأ
- متعملش نفسك فتك في التصوير وانت لسه بتتعمل ولا حتى بعد ما تتعلم
- متصورش حد بورتريه إلا لما يبتسم وسنانه تبان
- متصورش حد بيقلك صورني وانا مش واخد بالي
- متعملش فيها بطل وتقول لصحابك انا هصوركم اول ما اجيب الكاميرا علشان وربنا ما هتعرف
- متعملش فيها جامد لما تتعرف على بنت حلوها وتقلها ما تيجي اعملك فوتوسيشن
- متفتكرش كل اللي معاه كاميرا بيعرف يصور ممكن يكون جايبها منظرة او ابوه جبهاله هداية او عاوز يبقى مواكب التكنولوجيا
- ارحم نفسك من كثر الاديت لان الصورة الطبيعة افضل
- متستخدمش الفلاش بليل ولا حتى الصبح غير لما تكون عارف تستخدمه
- لو هترفع صورة على فيس بوك متفكرش في كام عدد الليك والكومنتات اللي هتيجي زي ما تفكر قد ايه هتستفاد من النقد في الصورة
- حاول تتفرج على صور كتير كتير كتييير اوي وافضل اتفرج
- وربنا مفيش حاجة اسمها مصور بتاع كله حاول تركز في جانب معيين في الصوير وطور نفسك فيه علشان تفلح
- متفتكرش ان التصوير مهنة سهلة وهتجيب فلوس من اول ما تجيب كاميرا تبقي بتحلم واللي قالك كده بيضحك عليك علشان مصلحة انت هتتعب علشان تجيب اول قرش بس لما تتعب هتلاقي
- متفكرش في الفلوس اللي ممكن تجيلك من التصوير زي ما تفكر في الرسالة اللي عاوز توصلها
- مش بكتر الصور اللي بتنزلها يبقي انت كده اتعلمت عندك اول ١٠٠٠٠ صورة وحشين اه وحشين علشان بتكون بتتعلم فيهم
- مش علشان جايب كاميرا بروفيشنال بكارت ميمري يبقي تصور براحتك، علشان تبقي مصور شاطر خلي كل صورة بتصورها تكون صورة صح علشان مترجعش تندم بعدين
- لما تنزل تصور في مكان حاول تعرف الناس اللي في المكان ده بيحبوا ايه وبيكرهوا ايه علشان متعملش مشاكل انت ممكن تطلع منها خسران
- ركز في العدسات اكتر من ام الكاميرا لان العدسة بتديك اللي بتحلم بيه مش الكاميرا
- لو عاوز تكون مصور صحفي لازم اهم ميزة عندك تكون السرعة في الالتقاط علشان وربنا لو مكنتش سريع في الاشتباكات خصوصا يبقي تقعد في بيتك احسن
- وربنا ما لازم صورك تكسب في مسابقات علشان تكون مصور جامد ، اهم شئ لما حد يشوف صورتك من غير ما يعرف ان دي صورتك يعرف ان ده تصويرك
- حاول تفهم الكاميرا كويس اوي وكل حاجة فيها علشان تقدر تطلع افضل شئ منها ومتكتفيش بتعليم اي حد اتعلم مع نفسك علشان ده اللي هيفيدك اوي
- متشتغلش على مود اوتو مهما كان لانك لامؤاخذة لو هتشتغل على مود اوتو يبقي تركن الكاميرا على جمب وتجيب كاميرا ديجيتال ب٣٠٠ جنيه افضلك.
- ركز جدا في البوينت فوكس لان ده اهم شئ في الكاميرا وهو اللي ممكن يغيرلك شكل الصورة ركز فيه جدا جدا جدا
- درب ايدك على الكاميرا كل ما تلاقي نفسك فاضي صور اي حاجة تيجي قدامك حتى لو ورقة ،بس بالله عليك ما تنزلها على النت خلي الصور دي للتعليم
- متفتكرش ان كل ما معاك عده افضل هطلع نتائج افضل لا ممكن تطلع نتائج مبهرة وانت معاك حاجات بسيطة بس تكون مقتنع باللي معاك.
- متركزش في ام الاديت وتنسى الصورة اللي مصورها وخلي الاديت اخر خيار ليك علشان تعرف تقييم نفسك
- مش كل من عرف تصوير يعرف يدرس التصوير ولا كل ما فهم الكاميرا ينفع يكون مصور التصوير فن زي اي فن لازم تكون عندك الموهبة ولو مش عندك للاسف مش هتعرف تكون عندك علشان متتعبش نفسك وتقول هتعلم تصوير لان التصوير مبيتعلمش التصوير بيكتسب.
- لو هتصور حد او اطفال او اي كائن من كان لازم تتكلم معاه الاول او تلعب معاه علشان ياخد عليك لان ده هيطلع الصورة حلوة
- اصبر اصبر اصبر
- كمان مرة اصبر وربنا لازم الصبر في التصوير لانه هو اللي هيوصلك للي انت عاوزة واخيرا متحطش ميتين ام توقيع فوتوجرافرو وخلي تركيزك على العدسات